(In the Name of Allah, Most Gracious, Most Merciful)

(In the Name of Allah, Most Gracious, Most Merciful)

Habib Jalib's Ghazals

Habib Jalib
==*==KHATRAY MEIN PAKISTAN NAHI==*==
khatra hai zar daron ko,
girti hui diwaron ko,
khatray mein pakistan nahi,
KHATRAY MEIN PAKISTAN NAHI,
rang barangi karon ko,
amrika kay pyaron ko,
KHATRAY MEIN PAKISTAN NAHI,
khatra hai bat maron ko ,
magrib kay bazaron ko,
chorron ko makkaron ko,
KHATRE MEIN PAKISTAN NAHI,
khatra hai darbaron ko,
zardaron ke gham kharon ko,
nawabon ko , ghadaron ko,
KHATRE MEIN PAKISTAN NAHI

----------**********----------

==*Ye or Baat Teri Gali Main Na Aen Hum*==

Ye or Baat Teri Gali Main Na Aen Hum
Lekin Ye Kya,K Shehr Tera Chor Jaen Hum

Mudat Hui Hai Kou'e'Butan Ki Taraf Gae
Aawargi Se Dil Ko Kahan Tak Bachain Hum

Shayad Baqeet'e'Zeest Ye Sa'at Na A Sake
Tum Dastaan'e'Shouq Suno Aur Sunaen Hum

Be-Noor Ho Chuki Hai Buhut Shehr Ki Fiza
Tareek Raston Main Kahein Khoo Na Jaen Hum


Ab Aur Kia Kisi Se Marasim Barhain Hum
Yehi Buhut He Tujh Ko Agar Bhool Jaen Hum

Sehra-E-Zindagi Main Koi Dosra Na Tha
Sunte Rahe Hain Aap Hi Apni Sadaen Hum

Is Zindagi Main Itni Faraght Kise Naseeb
Itna Na Yaad Aa Ke Tujhe Bhool Jaen Hum

Aaj Uske Baghair Ab To Buhut Jee Udass He
JALIB Chalo Kahin Se Use Dhoond Lain Hum


----------**********----------

==*Pakistan ka matlab kya*==

Roti, kapda aur dawa
Ghar rehne ko chhota sa
Muft mujhe talim dila
Mein bhi Musalmaan hoon wallah
Pakistan ka matlab kya
La Ilaha Illalah…

Amrika se mang na bhik
Mat kar logon ki tazhik
Rok na janhoori tehrik
Chhod na azadi ki rah
Pakistan ka matlab hai kya
La Ilaha Illalah…

Khet waderon se le lo
Milen luteron se le lo
Mulk andheron se le lo
Rahe na koi Alijah
Pakistan ka matlab kya
La Ilaha Illalah…

Sarhad, Sindh, Baluchistan
Teenon hain Panjab ki jaan
Aur Bangal hai sab ki aan
Aai na un ke lab par aah
Pakistan ka matlab kya
La Ilaha Illalah…

Baat yehi hai bunyadi
Ghasib ki ho barbadi
Haq kehte hain haq agah
Pakistan ka matlab kya
La Ilaha Illalah…


----------**********----------

==*Bahut mein ne suni hai aap ki taqreer Maulana*==

Bahut mein ne suni hai aap ki taqreer Maulana
Magar badli nahin ab tak meri taqdeer Maulana

Khudara Shukr ki talqeen apne pass hi rakhen
Yeh lagti hai mere seene pe ban kar teeer Maulana

Nahin mein bol sakta jhut is darja dhitai se
Yehi hai jurm mera aur yehi taqsir Maulana

Haqeeqat ka kya hai, yeh to aap jaanen ya Khuda jane
Suna hai Jimmi Carter hai aap ka peer Maulana

Zameenen hon waderon ki, mashinen hon luteron ki
Khuda ne likh ke di hai yeh tumhen terhrir Maulana

Karodon kyon nahin mil kar Falastin ke liye ladte
Dua hi se faqat kat-ti nahin zanjir Maulana


----------**********----------

==*Pakistan bhi mera hai*==

Hindustan bhi mera hai aur Pakistan bhi mera hai
Lekin in donon mulkon mein Amrika dera hai



Aid ki gandam kha kar ham ne kitney dhokey khai hain
Poochh na hamne Amrika ke kitne naaz uthai hain
Phir bhi ab tak wadi-e gul ko sangeenon ne ghera hai
Hindustan bhi mera hai aur Pakistan bhi mera hai

Khan Bahadur chhodna hoga ab to saath Angrezon ka
Ta bah gareban aa pahuncha hai phir se hath Angrezon ka
Macmilan tera na hua to Kenedy kab tera hai
Hindustan bhi mera hai aur Pakistan bhi mera hai

Yeh dharti hai asal mein, pyare, mazdooron dahqanon ki
Is dharti par chal na sakegi marzi chand gharanon ki
Zulm ki rat rahegi kab tak ab nazdik savera hai
Hindustan bhi mera hai aur Pakistan bhi mera hai

----------**********----------


==*Bachchon pe chali goli*==
Bachchon pe chali goli
Maan dekh ke yeh boli
Yeh dil ke mere tukde
Yun royen mere hote
Mein dur khadi dekhoon
Yeh mujh se nahin hoga
Mein Dur khadi dekhun
Aur ahl-e sitam khelen
Khun se mere bachchon ke
Din-raat yahan holi
Bachchon pe chali goli
Maan dekh ke yeh boli
Yeh dil ke mere tukde
Yun royen mere hote
Mein dur khadi dekhun
Yeh mujh se nahin hoga
Meidan mein nikal aayi
Ek barq si lehrai
Har dast-e sitam kanpa
Bandooq bhi tharrai
Har simt sada gunji
Mein aati hun, mein aayee
Mein aati hun, mein aayee
Har zulm hua batil
Aur seham gaye qatil
Jab us ne zaban kholi
Bachchon pe chali goli
Us ne kaha khun-khwaro!
Daulat ke parastaro
Dharti hai yeh ham sab ki
Is dharti ko naa-dano!
Angrezon ke darbano!
Sahab ki ata-kardah
Jagir na tum jano
Is zulm se baaz aao
Bairak mein chale jao
Kyon chand luteron ki
Phirte ho liye toli
Bachchon pe chali goli

----------**********----------

Haryali ko aankhen tarsen bagiya lahoo luhan
Pyar ke geet sunaoon kis ko shehar hue weeran
Bagiya lahoo luhan
Dasti hain suraj ki kirnen chand jalaye jaan
Pag pag maut ke gehre saye jeewan maut saman
Charon ore hawa phirti hai le kar teer Kaman
Bagiya lahoo luhan
Chhalni hain kaliyon ke seeney khoon mein lat paat
Aur nahjaney kab tak hogi ashkon ki barsaat
Dunya walon kab beeteinge dukh ke yeh din raat
Khoon se holi khel rahe hain dharti ke balwan
Bagiya lahoo luhan

----------**********----------
==*Khuda hamara hai*==

Khuda tumhara nahi hai khuda hamara hai
Use zamin pe yeh zulm kab gawara hai
Lahoo piyoge kahan tak hamara dhanwano
Badhao apni dukan seem-o zar ke deewano
Nishan kahin na rahega tumhara shaitano
Hamein yaqeen hai ke insaan usko pyara hai
Khuda tumhara nahin hai khuda hamara hai
Use zameen pe yeh zulm kab gaawara hai
Nai shaoor ki hai roshni nigahon mein
Ek aag si bhi hai ab apni sard aahon mein
Khilenge phool nazar ke sahar ki bahon mein
Dukhe dilon ko isi aas ka sahara hai
Khuda tumhara nahin hai khuda hamara hai
Use zameen pe yeh zulm kab gawara hai
Tilism-e sayah-e khauf-o hiras todenge
Qadam bandhayenge zanjeere-e yaas todenge
Kabhi kisi ke na ham dil ki aas todenge
Rahega yaad jo ehd-e sitam guzara hai
Use zamin pe yeh zulm kab gawara hai

----------**********----------

==*Yah Dais Hai Andhay Logoon Ka*==

Yah Dais Hai Andhay Logoon Ka
Aye Chaand Yahan Na Nikla Ker..

Bay-Naam Say Sapnay Daikha Ker
Aye Dil Her Ja Na Phisla Ker
Yah Dais Hai Andhay Logoon Ka
Aye Chaand Yahan Na Nikla Ker


Na Dartay Hain Na Naa-dim Hain
Na Maanain K woh Khaadim Hain
Yahan Ulti Ganga Behti Hai
Is Dais Main Andhay Haakim Hain


Yah Raqam Saray Likhtay Hain
Qawneen Yahan Na Tiktay Hain
Hai Yahan Per Karoobaar Bohat
Is Dais Main Gurday Biktay Hain


Yahan DOLLAR DOLLAR Hoti Hai
Or G.D.P Kasootti Hai
Kuch Loog Hain Aali Shaan Bohat
or Kuch Ka Nuqsaan Rootti Hai

Umeed Ko Lay Ker Parhtay Hain
Phir Degree Lay ker Phirtay Hain
Jab JOB Na Un Ke Milti Hai
Phir Khud-kush Hamlay Kartay Hain

Woh Kehtay Hain Sab Acha Hai
Or Fooj Ka Raaj Sacha Hai
Khoota Gaari Wala Kyun Yah Manay
Jab Bhooka Us Ka Bacha Hai

Yah Dais Hai Andhay Logoon Ka
Aye Chaand Yahan Na Nikla Ker...!!!

----------**********----------

No comments: